DAVAO CITY – Mipakita ug pag-uyon si Davao city Mayor Inday Sara Duterte-Carpio sa nahimong pahayag sa iyang amahan nga si Pangulong Rodrigo Duterte atol sa ulahing State of the Nation Address (SONA) nga himuong ulahi sa prayoridad sa “Build, Build, Build” program ang dakbayan sa Davao.
Angayan sumala pa nga siguruhon sa Duterte administration nga ang uban nga areas makaangkon ug patas nga infrastructure projects.
Gikanayon sa pagsugod pa lamang sa administrasyon, gimandoan na matud pa ni Pangulong Duterte ang iyang economic managers nga ibutang ang mga proyekto sa uban nga areas nga mas prayoridad samtang ulahi na ang Davao City.
Pipila sa mga nagpadayon nga multi-billion projects sa siyudad ang first phase sa 18.50-kilometer Davao City Coastal Road nga kantidad sa P2.6 billion, 10.7-kilometer first segment sa four-lane Davao City Bypass Road Project nga kantidad sa P13.230 billion, ug High Priority Bus System nga kantidad sa P18.6 billion.
Nasayran nga ang Davao City Coastal Road makompleto sa 2023. Misaad sab ang kagamhanan nga ipadayon ang 3.98-kilometer Davao City-Samal Island Bridge nga kantidad sa P19.321 billion ug ang 102-kilometer Tagum City-Davao City-Digos City segment sa Mindanao Railway Project (MRP) nga gipondohan ug P81.7 billion gamit ang loans gikan sa Chinese government.
