DAVAO CITY – Laoman nga daghanan pang vaccination roll out ang ipahigayon sa siyudad dungan sa pag-abot sa kapin 123,000 doses sa Covid-19 vaccines sa Davao Region kagahapong adlawa hinungdan nga misaka na ang doses niini sa dul-an 1.4 million. Ang duruha ka brand sa bakuna miabot sa Davao airport sa managlahi nga oras.
Una nga miabot pasado alas siete sa buntag ang 51,480 doses sa Pfizer-BioNTech Covid-19 vaccine samtang pasado alas otso ang 72,000 doses sa Sinovac CoronaVac vaccine.
Sa kasamtangan, aduna na matud pay 1,388,960 doses sa Covid-19 vaccines ang Davao region diin gilangkuban kini sa mga brand nga Sinovac, AstraZeneca, Pfizer, Gamaleya Sputnik V, ug Johnson & Johnson.
Sa mga nadawat nga bakuna sa Davao region, mukabat na sa 684,601 ang nabakuna diin 521,344 ang sa first dose ug 186,771 sa second dose. Ang nahisgutan nga mga bakuna ang gidonar sa Covax facility samtang ang uban gipalit sa gobyerno.
