DAVAO CITY – Walay natala ang lokal nga panggamhanan sa Davao nga adverse ug fatal effects sa padayon nga pagpabakuna sa mga Dabawenyo.
Sumala ni Dr. Michelle Schlosser, tigpamaba sa COVID-19 Task Force sa dakbayan, mild ug short-lasting lang ang mga side effect nga mabatian sa mga nabakunahan ug mawala dayon kini sulod sa 24 oras.
Gipasalig usab niya nga adunay naka-standby nga mga doktor ug mga ospital sa higayon nga adunay bakunado nga makasinati og grabe nga adverse effect sa bakuna.
Andam usab sumala niya ang lokal na panggamhanan ug ang Department of Health nga mag-imbestiga sila dayon ug galing aduna’y matalang susamang kaso.
Sa kasamtangan, ginapahigayon ang pagpabakuna sa Priority Groups A1,A2, A3, A4, A5, nga gilangkuban sa healthcare workers, senior citizens, persons with comorbidities, frontline workers in essential sectors ug indigent population.
Anaa sa 290,946 ka indibidwal na ang nabakunahan alang sa first dose samtang 112,499 ka indibidwal na ang nabakunahan alang sa second dose.
Gilauman sa lokal nga panggamhanan nga mabakunahan ang 1.2 million ka mga Dabawenyo aron makab-ot ang herd immunity sa Dakbayan.
Sa pikas bahin, lakip pa gihapon ang Dakbayan sa Davao sa mga LGU nga adunay pinakadaghan nga mga kaso sa COVID-19 nga matala matag adlaw.
Subay sa ulahing monitoring sa OCTA Research Group, nakatala og 225 daily average cases ang Dakbayan sa milabayng semana.
