DAVAO CITY – Muabli na og balik ang COMELEC office sa Dakbayan sa Davao human ang hapit duha ka bulan nga pagsirado niini gumikan sa pagpatuman sa Modified Enhanced Community Quarantine kon MECQ, ug sa pagbawal usab sa lokal nga panggamhanan sa Davao sa mga gathering ug non-essential activity nga ginapatigayon sa mga buhatan sa gobyerno.
Subay sa ilang post sa official Facebook Page niini, andam na ang buhatan nga mudawat og mga transaksyon Lunes hangtod Biyernes, alas 8 sa buntag hangtod alas 5 sa hapon.
Kahinumduman nga niadtong Mayo 24, gi-anunsyo ni Mayor Inday Sara Duterte-Carpio nga ibawal usa sa lokal nga panggamhanan ang tanang face-to-face government transactions sama sa voter’s registration tungod sa pagsaka sa mga kaso sa COVID-19 sa Dakbayan.
Human ang duha ka adlaw, niadtong Mayo 26, temporaryo nang gipaundang ang maong mga transaksyon subay sa gipagulang Executive Order Number 31 sa lokal nga panggamhanan.
Gikabalaka kini sa COMELEC tungod gamay na lang ang nahibiling mga adlaw ayha mahuman ang voter’s registration.
Niapela usab sila ngadto sa alkalde nga i-exempt ang ilang buhatan sa pagpatuman sa nahisgutang kamanduan.
Kahinumduman usab nga uban sa pagpaundang sa voter’s registration, gipaundang sab ang registration alang sa PhilSys kon National ID.
