DAVAO CITY – Gisugdan na karon sa mga sakop sa Philippine coast Guard (PCG) ingon man sa Regional Maritime Unit (RMU)-11 kini aron masiguro nga walay mananagat nga makalapas sa gipatuman nga closed fishing season sa Davao gulf nga gisugdan kaniadtong Hunyo 1 ug matapos sa Agosto 31, 2021.
Gamit sa RMU-11 ang ilang high speed tactical water craft sa pagpahigayon ug patrolya sa Davao gulf diin ilang duolon ang mga nangisda aron sutaon kung aduna kini igong dokumento sa ilang pagpanagat ug masiguro nga wala kini migamit ug ginadili nga mga kagamitan sama sa bagnet ingon man nigpis nga mga pukot nga sagad maoy makakuha sa mga gagmay nga mga isda.
Sumala pa kang P/Capt. Aldin Brogarollas, RIO-RMU-11 nga tulo ka higayon sa usa ka semana nila himuon ang pagpatrolya sa Davao Gulf ug random nila kini nga himuon aron masiguro nga walay illegal fishing nga mahitabo panahon sa kabuntagon ug kagabhi-on.
Sa kasamtangan wala pay nasikop ang otoridad sukad nga gipatuman ang closed fishing season sa milabay nga adlaw.
Nagpahimangno na lamang ang RMU-11 ingon man ang BFAR-11 nga dili mosulay sa pagpahigayon ug illegal nga pagpanagat gumikan kay hugtanon nila nga ipahigayon ang pagpatrolya sa kadagatan.
