DAVAO CITY – Giila ni Dr. Ashley Lopez, OIC sa City Health Office (CHO) nga dakong tabang ang nagpadayon nga surveillance swabbing sa dakbayan sa Davao human nga adunay mga indibidwal ang nasubay nga natakdan ug covid-19.
Sa kasamtangan, mikabat na halos 6,000 ang gipailalom sa libre nga swab test ug migula nga adunay 72 na ang nagpositibo.
Dakung tabang sumala pa ang maong lakang aron nga mahatagan gilayon ug hinanali nga pagtagad ang mga natakdan sa kagaw ingon man mapahigayon gilayon ang contact tracing.
Kung wala matud pay gipahigayon nga community swabbing, posibleng maglatagaw ang mga natakdan niini ug magpadayon ang transmission sa Covid-19 sa siyudad.
Sa kasamtangan, padayon nga himuon sa CHO ang nahisgutan nga lakang ngadto sa mga vendors ingon man mga driber sa pampasaherong mga sakyanan sa dakbayan.
