DAVAO CITY – Gilayon nga nagpadala ug mga ekipo ang lalawigan sa Mati Davao Oriental sa usa ka barangay sa lugar nga nakasinate pagdahili sa yuta kagahapon sa hapon.
Gilayon sab dayon nga gi-rescue ang usa ka pamilya sa Sitio Licupon 1, Purok 5, Brgy. Sanghay aron nga dili mabutang sa risgo ang ilang kinabuhi. Una ng gibutyag Mati City Disaster Risk Reduction and Management Office (MDCRRMO) nga ang apektado nga panimalay ang gipanag-iyahan sa usa ka Rodelio Llenor diin kauban niini nga nagpuyo ang unom niya ka mga kabanay.
Sa kasamtangan, anaa una nagpabilin sa ilang paryente sa Sitio Iba, Barangay Dawan ang nahisgutan nga pamilya kini aron masiguro nga dili mabutang sa peligro ang ilang kinabuhi sa higayon nga masinatian ang pagdahili sa yuta ilabi na nga sagunson karon ang mga pag-ulan sa Davao region.
Nagpahimangno sab karon ang mga hingtungdan nga ahensiya sa kagamhanan nga dili na hulaton pa nga mabutang sa delikado ang sitwasyon inay mangunay na lamang sa paghikling o moadto sa mas luwas nga lugar.
