DAVAO CITY – Gipasalig sa Davao City Police Office (DCPO) pinaagi sa ilang director nga si Chief Kirby John Kraft nga palambuon pa nila karon ang pagpatuman sa gipagulang executive orders (EOs) sa lokal nga kagamhanan ilabi na ang pagpatuman sa Covid-19 guidelines sa quarantine control checkpoints sa dakbayan.
Tipik lamang kini human ang ulahing komento ni Davao City Mayor Sara Duterte-Carpio nga adunay sayop sa pagpatuman sa guidelines sa pipila ka mga law enforcers nga nadestino sa pipila ka mga checkpoint hinungdan nga mihatud kini ug kalibog ngadto sa mga motorista ug residente.
Sumala sa Mayor nga walay rason nga masayop ilabi na nga tin-aw ang nakasulat sa guidelines ug EOs.
Uyo sab si Kraft sa nahimong pahayag sa Mayor dungan sa saad nga motamud ang kapulisan sa mandato ug gipasalig nga dili masayop.
Nanawagan sab ang opisyal ngadto sa mga motorista nga i-report gilayon sa ilang buhatan kung makasinate ug harassment gikan sa otoridad sa higayon nga molatas sa city checkpoints.
Gitambagan sab niini ang publiko nga dili magpasibaw sa ilang reklamo sa online sanglit dili makatabang aron nga masulbad ang reklamo.
Gipangayo ni Kraft ang pagsabot ug kooperasyon sa katawhan ilabi na panahon sa pag-check sa mga dokumento nga kabahin sa gipatuman nga quarantine measures.
