DAVAO CITY – Andam na ang mga sakop sa kapulisan sa subling pagpatuman sugod karong adlawa sa FM pass diin anaa sa 40 ka mga control points aron mosubay kung nagamit ug tarong sa mga residente ang ilang gihuptan nga FM pass.
Gibalik ang pagpatuman niini aron nga malimitahan ang lihok sa mga tawo human nga padayon karon ang pagsaka sa covid-19.
Sa kasamtangan, naghulat pa ang kapulisan sa mamahimong guidelines sa lokal nga kagamhanan kalabot sa mga nawala na ang FM pass sukad nga gi-lift kini kaniadtong bulan sa Agosto.
Una ng gibutyag ni Police Capt. Rose Aguilar, tigpamaba sa Davao City Police Office (DCPO) nga 24 oras nga magbantay ang mga kapulisan sa mga control points human nga hugtanon ang kamandoan sa lokal nga kagamhanan bantayan ang mga mogawas ug sulod sa dakbayan.
