DAVAO CITY – Gumikan sa nagpadayon nga kaso sa coronavirus pandemic sa tibuok kalibutan, padayon sab ang panawagan sa Securities and Exchange Commission-Davao Extension Office (SEC-DEO) batok sa nagpadayon nga presensiya sa investment scams nga nagapangilad sa mga tawo ilabi na karon nga daghanan sab ang nawad-an ug trabaho gumikan sa impact sa pandemic.
Tungod niini doble ang gihimong pagmonitor karon sa ahensiya sanglit mogamit na sab ang mga scammers ug internet sa pag-recruit sa mga indibidwal diin kasagaran sa ilang mabiktima kadtong mga kabus nga tawo nga mohiram ug kuwarta ug dako ang ilang mamahimong ginansiya sulod lamang sa ubos nga panahon.
Ang maong panawagan gihimo sa ahensiya isip kabahin sa pag-obserba sa unang Investor Protection Week nga kabahin sa Proclamation No. 846 nga gi-isyu ni Pangulong Rodrigo Duterte sa milabay nga Nobyembre 15, 2019.
Gikanayong ang week-long information campaign gipahigayon sa kaniadtong Nobyembre 9 hangtud 13 diin tumong niini nga mapalapdan pa ang kaalam kalabot sa kamahinungdanon sa pag-invest ug proteksiyon ug dili gilayon dali nga ma-ilad sa mga nagkadaiyang investment schemes.
