DAVAO CITY – Gitambagan karon sa ahensiya sa City Tourism Operation Office (CTOO) ang mga adunay plano nga moadto sa mga tourist destinations sa siyudad nga subayon pag-ayo kung aduna kini permit ilabi na ang mga resorts.
Kahinumduman nga una ng gibutyag sa ahensiya nga bisan aduna nay mga suruyanan karon sa dakbayan partikular na sa Marilog district ang nag-abli, limitado pa gihapon ang gitugutan sa ahensiya sanglit nagpabilin pa gihapon ang bahad sa covid-19.
Sumala pa kang Generose Tecson, head sa CTOO, online booking ang ginapahigayon sa kasamtangan ug bisan tuod nga nag-atubang ug pandemiya ang siyudad, daghanan pa gihapon ang nagasuroy.
Mas maayo sumala pa nga moadto sa mga tourist destination nga adunay permit gikan sa ilang buhatan gumikan kay makasiguro ang mga manuroy sa lugar nga mitamud kini sa health protocols.
