DAVAO CITY – Magtukod ug dugang pang mga holding facilities ang DPWH 11 alang sa pag-atiman sa mga pasahero nga moabot sa Davao International airport.
Sa kasamtangan, moabot na sa 600 ang bed capacity sa holding facilities diin magpaabot ang mga pasahero sa eroplano sa resulta sa ilang RT-PCR test.
Gikanayon ni DPWH spokesperson Dean Ortiz, pun-an pa nila ug 400 bed capacity ang mga holding areas sa airport gumikan kay lauman ang mas pagdaghan pa sa mga pasahero sa eroplano nga moabot sa syudad sa mosunod nga mga adlaw.
Samtang operational na usab ang 400 bed capacity sa holding area sa davao international airport lakip na ang 200 ka mga bed capacity sa Sasa old airport.
Nasayran nga gina-atiman sa Sasa old airport ang mga pasahero sa eroplano nga dili taga dakbayan sa dabaw.
Dugang pa ni Ortiz nga paningkamutan nilang mahuman ang holding facilities sa Davao international airport sa bulan sa desyembre.
Gikatakda usab nga tukuron ang usaka quarantine facility nga adunay 40 bed capacity sa Panacan ning syudad ug lain pang 32 ka bed capacity sa quarantine facility alang sa mga medical personnel sa SPMC.
Samtang, gibutyag usab ni Ortiz nga plano usab sa DPWH nga magtukod ug susamang pasilidad sa ubang bahin sa davao region.
