DAVAO CITY – Isip acting Davao City Mayor, nanawagan karon si Sebastian “Baste” Duterte ngadto sa mga dabawenyo nga kanunay pa gihapon nga mag-igmat ilabi na nga padayon pa karon ang pagsaka sa kaso sa Covid-19 dinhi sa dakbayan.
Sumala sa Acting Mayor, gipahugtan pa karon ang operasyon sa mga healthcare facilities nga gikanayong hapit na nga makab-ot ang maximum capacity.
Subling mipahimangno si Baste sa publiko nga istriktong motamud sa health protocols aron malikayan ang transmission sa virus.
Mi-apela sab kini sa tanan nga pabilin lamang sa ilang mga panimalay ug mogawas lamang alang sa trabaho, emergency, ug uban pang mahinungdanon nga mga aktibidad.
Angayan sab sumala pa nga protektahan ang kaugalingon sa higayon nga moadto sa mga malls, grocery stores, ug public markets.
Hugtanon sab karon nga ginadili ang pagtapok-tapok ug sayo na nga mobisita sa mga sementeryo sanglit ginadili na kini pagsulod sa Oktubre 29 hangtud November 4.
Padayon sab sumala pa karon ang lokal nga kagamhanan sa pagpatuman sa minimum health standards ug nanawagan kini sa tanan nga magkahiusa alang sa kaluwasan sa matag Dabawenyo.
