DAVAO CITY – Balhug karon sa presohan sa Panabo City Police Office ang giilang City Target List Number 10 nga notadong nagapamaligya illegal nga druga sa lugar.
Una ng gilusad ang operasyon sa mga sakop sa PDEA ug kapulisan sa Purok 9, Urban Poor, Barangay Salvacion, Panabo City, Davao del Norte.
Naila ang suspek nga si Anselmo Española Medalla Jr. @ Jun-Jun/Anselmo Medallon Jr., 28 anyos, ulitawo ug residente sa nahisgutan nga dapit nga nasikop human nga namaligya kini ug pakete sa ginadili nga druga nga mitimbang ug kapin kun kulang (1) gram nga kantidad sa Php. 9,000 ngadto sa nagpaka-aron ingnon nga poseur buyer.
Dihang gihiling sa otoridad nakuha sab sa posisyon niini ang laing tulo pa ka mga pakete sa illegal drugs nga mitimbang ug kapin kun kulang 12 grams nga adunay street value nga Php. 180,000, drug paraphernalia ug buy-bust marked money.
Balhug karon sa presohan ang dinakpan ug gi-andam na ang kasong kalapasan sa Republic Act 9165 kun Comprehensive Dangerous Drugs Act of 2002.
