DAVAO CITY – Ang pagka-gahi ug ulo sa mga residente ang nag-una nga hinungdan nganong gipa-ilalom sa Hard Lockdown ang tibuok Barangay 23-C ning dakbayan sugod niadtong sabado sa hapon.
Kini ang gikumpirma mismo ni Davao city Mayor Sara Duterte-Carpio.
Gikanayon ni Mayor Inday Sara nga bisan ang barangay kapitan mi-angkon nga lisud kaayo pasundon ang mga residente sa gipatumang guidelines sama na pagsul-ob ug face mask kung mogawas sa balay, himuon ang social distancing, dili mag-sige ug gawas sa balay ug kanunay manghugas ug kamot gamit ang sabon ug tubig o kaha alcohol.
Gipasabot usab sa mayor ngayong gipa-ilalom sa hard lockdown ang Brgy 23-C, kini aron malikayan ang pagkatag pa sa virus sa laing mga lugar human daghan sa mga residente ang nag-positive sa COVID 19 ug mayoriya niini mga trabahante nga halos matag adlaw mogawas ug daghan ug gikahimamat nga mga tawo.
Dugang pa sa Mayor, mag-agad sa resulta sa swab test kung kanus-a wagtangon ang hard lockdown.
Kung human sa 14 days lockdown naa lang gihapon mag-positive posibling i-extend na usab kini ug laing 14 days.
Apan kung magpadayon lang gihapong naay infected, mohimo na ug re-assessment ang task force.
Ang hard lockdown ang labaw pa sa ECQ diin tanang mga residente wala gitugutan nga makagawas sa ilang balay gawas lamang kadtong mga magpa-checkup sa doktor.
Nanghatag na ang syudad ug relief goods sa mga residente, ug ang mga padre de pamilya o bread winner ilakip sa mga beneficiary sa Work for davao diin magtrabaho sila sulod lamang usab sa ilang barangay.
