DAVAO CITY – Gibutyag ni Davao City Mayor Sara Duterte-Carpio nga limitahan sa lokal nga kagamhanan ang pag-operate sa Roxas Night Market sa higayon nga subli na kining ablihan pagbalik.
Sumala sa Mayor nga kung mosulod na ang siyudad sa “new normal,” kinahanglan nga paubsan na ang ihap sa mga slots sa night market.
Gipasalig niini nga ang mga apektadong vendors sa Roxas Night Market ang tugutan pa gihapon nga makapamaligya apan dyutay lamang nga batch.
Posible sab nga paubsan na sab ang shift sa matag batch aron mas daghanang mga vendors ang makabaligya.
Nasayran nga ayha ang pandemic, matag batch sa mga vendors gilangkuban sa 130 tenants sa accessories area, 130 sa ready-to-wears (RTWs), 116 food vendors, ug kapin gatus ang massage therapists.
Gikanayong ang mga batch sa vendors ug tenants mamahimong mag-ilis matag tulo ka bulan.
Gitataw sab ni Mayor Inday nga kung ablihan na ang night market, dyutay na lamang sab nga mga stalls nga namaligya ug pagkaon ingon man dry goods ang tugtan nga mag-operate.
Ikontrola na sab nila ang ihap sa mga tawo nga mosulod sa night market.
