DAVAO CITY – Nakapadala na matud pa sa ilang tubag ang upat ka mga Mayor sa Davao region ngadto sa Department of Interior and Local Government nga gihatagan ug show-cause orders gumikan sa ‘poor performance’ sa mga nahisgutan sa pagpatuman sa Special Amelioration Program (SAP).
Gikanayong ang regional office sa DILG ang magpatuman kung unsa man ang mamahimong aksiyon o rekomendasyon sa central office.
Subay sa DILG official site, 43 mayors ang hatagan ug show-cause orders human nga pakyas kini nga maangkon ang standards sa distribution sa cash subsidy ngadto sa mga kwalipikadong mga residente.
Una ng gibutyag ni DILG Secretary Eduardo M. Año nga ang local chief executives maoy mohatag ug katin-awan kung nganong huyang ang iyang performance luyo sa duruha ka higayon nga extension sa deadline nga gihatag sa local government units.
Kahinumduman nga 43 ka mga LGUs ang naka-score 79% paubos kung hisgutan ang accomplishment rate.
Onse sa mga nahisgutan nga Mayor ang sa Western Visayas, walo sa Mimaropa, lima sa Central Visayas, upat sa Davao Region, ug upat sa National Capital Region.
Una na sab nga gibutyag ni Alex Roldan, regional director sa DILG-11 nga pipila na lamang ka mga barangay sa Davao region ang wala naka-paskil sa listahan sa ilang mga benepisiyaryo sa SAP.
Sa kasamtangan kapin 90 porsyento na matud pa ka mga barangay ang naka-post niini.
