DAVAO CITY – Gikalipay pag-ayo ug giila nga dakong tabang sa pipila ka mga Public Utility Jeepney (PUJ) drivers ang ilang nadawat nga unang sweldo sa pagpailalom nila sa Tulong Panghanap Buhay sa ating displaced/disadvantage workers (TUPAD) program.
Ang mga nahisgutan temporaryo nga gi-hire sa kagamhanan aron nga motrabaho human nga nawad-an na sila ug panginabuhian sulod na sa halos usa ka bulan sukad nga gipatuman ang community quarantine tungod sa pagkuyanap sa Covid-19.
Sumala pa kang Norman Baloro, tigpamaba sa TUPAd program, nga nadawat na sa pipila ka mga jeepney drivers ang una nila nga suweldo ug sa dili pa matapos ang kasamtangan nga bulan, madawat na sab sumala pa sa mga nahisgutan ang ikaduha nga hugna sa ilang suholan.
Gisugdan ang maong programa kaniadtong bulan sa Marso diin gilimitahan na lamang ang pagpasakay ug mga pasahero sa mga dyip isip pagpatuman sa Social distancing hinungdan nga dili sab makabawi ang mga nahisgutan sa ilang pagpamasada.
Karong adlawa, lain pang batch sa mga driver ang makadawat ug hinabang isip kabahin pa gihapon sa programa.
