DAVAO CITY – Nanawagan si Davao City Mayor Inday Sara Duterte-Carpio ngadto sa publiko nga motamud sa mga sumbanan nga gipatuman ilalom sa community quarantine sa siyudad gumikan kay alang lamang kini sa kaayohan sa tanan.
Kahinumduman nga gideklara sa Mayor ang community quarantine pinaagi sa usa ka Executive Order No. 10 series of 2020.
Unod niini nga kinahanglan ang mga dabawenyos magpuyo lamang sa ilang tagsa-tagsa ka mga panimalay ug mugawas lamang alang sa trabaho, pagpalit og pagkaun o tambal, muadto sa ospital o maglabay og basura.
Suspendido usab matud pa ang mga mass gatherings ug mga klase gikan sa kindergarten hangtod sa post-graduate studies hangtod nga mawagtang na ang gipatuman nga state of public emergency.
Sa pagpatuman sa community quarantine sa dakbayan sa Davao, isuspende usab ang tanang mga religious activities.
Samtang magpadayon lamang gihapon matud sa mayor ang trabaho sa gobyerno.
Ang mga empleyado gikan sa laing mga probinsya mamahimong makasulod sa syudad apan kinahanglan nga musubay sila sumala pa sa gipatuman nga screening procedures.
Kinahanglan usab nga mangandam ug magpatuman og flexible workplan ang mga pribado nga kompanya alang sa ilang mga empleyado.
Base na usab sa sumbanan nga gipagula, kinahanglan nga ipaagi na lamang online ang mga serbiyo og pagpamalit gikan na usab sa mga lokal nga suppliers.
Gidasig usab ni Mayor Sara nga mag-pahigayon una og mga online meetings ug bank transactions.
Gipamahayag niini nga tugutan ang mga public transportation ug ang mga cargo deliveries sa dakbayan.
Samtang gikanayon usab sa mayor nga ang tanang laing mga aktibidad nga dili pa madetermina ang ilakip na usab sumala pa sa mga sumbanan alang sa pagpatuman og community quarantine.
