DAVAO CITY – Pasakahan na ug kasong kalapasan sa Republic Act 9165 kun dangerous drugs act of 2002 ang magti-ayon nga nasikop sa gilusad nga buy bust operation sa otoridad diin narekober sa ilang posisyon ang halos usa ka milyon nga kantidad sa ginadili nga druga.
Una niini, gimonitor sa mga sakop sa Philippine Drug Enforcement Agency Regional Office XI inabagan sa Davao del Sur Police Provincial Office Provincial Drug Enforcement Unit ug uban pang security unit ang mga suspek hangtud nga ilang kining nasikop sa Purok 2, Barangay New Opon, Magsaysay, Davao del Sur.
Naila ang mga dinakpan nga sila si Bangilista Naga Eson alyas Vhangs, 31 anyos, residente sa Labungan, Datu odin Sinsuat, Maguindanao ug Clarrish Flores Orevillo alyas Kakay, 19 anyos ug residente sa Barangay Sinawilan, Digos City, Davao del Sur.
Nasikop ang magti-ayon sa PDEA Agent nga nagpaka-aron ingnon nga poseur buyer bugti sa P1,000.
Narekober sa otoridad gikan sa magti-ayon ang usa ka jumbo size ug usa ka big size nga pakete sa ginadili nga druga nga motimbang ug 60 gramos ug adunay street value nga P960,000 ingon man improvised glass tooter.
Kalakip sab sa gikumpiska ang sakyanan nga ilang gigamit sa illegal drug activities. Una ng nasayran kang PDEA regional director Antonio Rivera nga gikan pa sa Cotabato ang magtig-ayon apan nakalusot kini sa checkpoint sa Kidapawan gumikan kay si alyas Kakay sumala pa ang naggunit sa shabu diin gisusok niya kini sa iyang bra.
