DAVAO CITY – Midoble ang ihap sa patients under investigation (PUI) sa 2019 novel coronavirus-acute respiratory syndrome sa rehiyon sa Davao gikan sa 9 ngadto sa 18.
Kini subay sa 2019-nCoV tracker sa Department of Health (DOH) kagahapong adlawa diin 16 niini ang gi-admit sa lain-laing mga balay tambalanan sa rehiyon, usa ang gi-discharged, samtang ang usa midumili sa pagpa-admit.
Gibutyag sa DOH nga ang rehiyon nagpabiling gawasnon gikan sa maong virus bisan pa nga ang pipila sa mga test results wala pa miabot aron nga kumpirmahon ang ilang kahimtang.
Ingon usab, duha ka mga ospital lamang sa dakbayan sa Davao ang adunay mga isolation facilities nga muatiman sa mga PUIs.
Samtang wala pa usab mihatag og pamahayag ang DOH region 11 bahin sa kahimtang sa mga PUIs sa rehiyon.
Sa pakighinabi kagahapong adlawa kang Southern Philippines Medical Center (SPMC) Chief of Clinics ug Health Emergency Management Bureau (HEMB) coordinator nga si Dr. Ricardo Audan, gipamahayag niini nga adunay lima ka mga pasyente ang na-admit sa ilang ospital.
Human sa mga resulta sa ilang specimen gikan sa Institute for Tropical Medicine (RITM), gi-discharge nila ang tulo ka pasyente human nga nag-negatibo ang resulta niini.
Una nang gipamahayag sa DOH 11 nga mamahimong adunay kalainan tali sa national data ug local data gumikan kay ang uban sa mga impormasyon gikan sa rehiyon mahimong wala malakip dihang gihimo sa DOH national office ang daily report ug malakip lamang kini sa sunod nga pag-update.
Samtang naghulat pa ang SPMC sa resulta sa laing duha ka PUIs ug nagtuo si Dr. Ricardo Audan nga negatibo usab kini sa 2019-nCoV ug miingun nga sa dihang anaa sa isolation facility ang lima ka mga PUIs, wala kini nagpakita og mga timailhan ug sintomas sama sa hilanat ug ubo.
