DAVAO CITY – Aron nga mapahugtan pa ang seguridad dinhi sa dakbayan sa Davao, laraw karon nga iduso sa committee on public safety and security sa City council nga dungagan ang mga lugar sa siyudad nga ideklarang maximum security zone.
Kabahin niini, gikanayon ni Konsehal Mabel Sunga-Acosta nga usa sa ilang palambuon karon ang tulo ka mga checkpoints sa siyudad nga gilangkuban sa Lacson Calinan, Sirawan ug sa Lasang Calinan diin paninduton pa kini ug tukuran og mas nindot nga istraktura aron nga dili na maulanan ang mga pasahero nga munaog aron nga mopailalom sa inspeksiyon.
Gitataw sab sa opisyal nga dungagan nila ang lugar nga ipailalom sa maximum security zone aron masiguro ang kaluwasan sa katawhan sama na lamang sa mga pantalan, tugpahanan, terminal ug daghanan pang lugar nga sagad dagsaon sa mga tawo.
