DAVAO CITY – Gikatakda na nga pasakahan og kaso ang walo ka mga indibidwal nga nasikop sa Calinan Police ug Task Force Davao (TFD) diin nakuha sa ilang posisyon ang P3 milyones nga kantidad sa shabu.
Gikanayon nga pasulod sa checkpoint sa Calinan ang suspek ug dihang gipahigayon ang paghiling, narekober sa ilang posisyon ang mga iligal nga druga nga motimbang og 179 grams.
Una ng naila ang mga dinakpan nga sila si Abolker Cabugatan, Oden Busran, Jerry Ali, Lando Ali, Norlayla Dipatuan, Eddie Acop, Mohammad Gubat, ug Rosalyn Abdulgani susama nga residente sa Lanao del Sur.
Kahinumduman nga sakay ang mga nahisgutan sa Toyota Innova diin gi-inspeksiyon sa otoridad ang ilang dala nga mga butang pinaagi sa X-ray scanner.
Narekober sa ilang posisyon ang mga nagkadaiyang gidak-on sa shabu.
Susama karon nga anaa sa kustodiya sa Calinan police ang mga dinakpan alang sa tukma nga disposisyon ug iduso na ang kasong kalapasan sa Republic Act 9165 o Comprehensive Dangerous Drugs Act of 2002.
