DAVAO CITY – Hingpit na nga nakabsan sa iyang kinabuhi kagahapong adlawa ang broadcaster nga nakaangkon ug daghanang samad pinusilan sa iyang lawas human kini gipusil kaniadtong Oktubre 30 sa Tacurong City.
Human ang usa ka bulan dihang nahitabo ang insidente, nakutloan na sa iyang kinabuhi kagahapong adlawa si Benjie Caballero sa Radyo ni Juan FM station nga nakabase sa Tacurong City, Sultan Kudarat samtang kini gitambalan sa Southern Philippines Medical Center (SPMC).
Gikumpirma ni Gina Caballero, igsuon sa biktima, ang kamatayon sa biktima gumikan sa pneumonia.
Una ng na-confine si Caballero sa St. Louis Hospital sa Tacurong City apan gibalhin sa SPMC alang sa pagpatambal.
Gilayon sab dayon gilubong sa iyang kabanay ang biktima sa Barangay Inas, M’lang, North Cotabato subay na sab sa tinuohang muslim.
Kahinumduman nga usa ka wala mailhing suspek ang mipusil kang Caballero samtang naghulat kini og masakyan atubangan sa ilang pinuy-anan.
Gipusil ang biktima sulod sa lima ka higayon diin gamit sa suspek ang .45-caliber nga armas.
Dali pa kini nga gidala sa St. Louis Hospital apan nasayran nga apektado ang baga niini human nga na-igo og duruha ka bala.
Una ng gibutyag ni Presidential Task Force on Media Security (PTFoMS) Executive Director Undersecretary Joel Egco nga himuon nila ang tanan aron nga manubag ang mipaluyo sa krimen.
Sa kasamtangan, wala pa gihapon nailhan ang suspek nga mipaluyo sa pagpatay sa biktima.
