DAVAO CITY – Aron nga matabangan ang mga mag-uuma nga apektado sa kusog nga pagtay-og sa lalawigan sa Davao del Sur, nagpadayon karon ang pagpanghatag ug suporta sa Department of Agriculture alang sa mga nahisgutan.
Sumala pa kang Jojo Yadao, Rice program coordinator sa DA-11, nga mikabat na sa kapin usa ka libo nga rice seed bag ang ilang nahatag sa mga mag-uuma aron nga makapadayon ang mga nahisgutan sa ilang kinabuhi luyo sa nasinatian nhga kalamidad nga mihatud ug epekto sa ilang panginabuhian.
Nasayran sab kang Yadao nga ayha pa miigo ang linog diin usa ang Davao del Sur sa grabeng naapektohan, nakahatag na matud pa sila ug mga semilya sa humay ngadto sa mga mag-uuma nga gikan sa ilang buffer stock.
Gipasalig sab ni Yadao nga sa kasamtangan, nagpabilin pa nga bastante ang supply sa mga rice seeds nga ilang mahatag sa mga mag-uuma sa umaabot nga panahon.
