DAVAO CITY – Aron nga dili na subling mahitabo ang pagpanic sa katawhan atol sa pag-igo sa kalamidad kaniadtong milabay nga semana, laraw karon sa ahensiya sa City Disaster Risk Reduction and Management Office (CDRRMO) nga palig-onon pa ang pagpahamtang ug silot batok sa mga tawo nga nagapakatag ug sayop nga impormasyon o fake news.
Sumala pa kang Alfredo Baluran, head sa CDRRMO, makiglambigit siya kang konsehala Mabel Sunga-Acosta kinsa chairperson sa Peace and Order committee sa City Council, alang sa pagpanday ug ordinansa aron nga pahamtangan ug bug-at nga silot ang mga magpakatag ug sayop nga impormasyon.
Una na sab nga gibutyag ni Baluran nga gawas sa gidakop nga maoy nagpakatag ug tsunami alert, usa pa ka lain nga indibidwal ang nangayo ug pasaylo human nga nag-post ug hulagway sa dagkong balod sa daliao Toril nga kuha pa kaniadtong mihapak ang habagat sa lugar.
Ang nahisgutan sumala pa nga lalaki ang anaa sa gawas sa nasod ug gikanayon niini nga nakuha lamang sab niya kini sa social media.
