DAVAO CITY – Sunod-sunod nga nakasinati ug mga pagtay-og ang pipila ka bahin sa Davao Region human sa magnitude 4.8 nga linog alas 9:49 kagabii nga nasinatian sa Jose Abad Santos, Davao Occidental.
Subay sa report sa Philippine Institute of Volcanology And Seismology (PHIVOLCS), subling nabati sa Jose Abad Santos ang magnitude 2.6 nga linog alas 11:16 kagabii; ug kaganinang alas 2:07 sa kadlawon nasinatian sab sa Sarangani, Davao Occidental ang linog nga adunay gikusgong 3.4 magnitude.
Samtang, alas 4:13 kaganinang buntag subling nasinatian ang magnitude 2.4 sa Jose Abad Santos.
Gawas niini, nabati sab ang 2.2 magnitude nga linog sa Governor Generoso, Davao Occidental alas 4:46 kaganinang buntag, samtang magnitude 2.8 kaganinang alas 4:58 sa Don Marcelino, Davao Occidental.
Nasinati sab ang magnitude 2.6 nga linog sa Tarragona, Davao Oriental alas 5:11 sa buntag ug kaganinang 7:13 sa buntag, nasinati ang magnitude 2.0 sa Baganga.
Gikanayon sa PHILVOLCS nga pulos tectonic ang tinubdan sa maong mga linog.
Hinoon, walay gikatalang damyos sa nahisgutang mga pagtay-og.
