DAVAO CITY – Patay ang usa ka Cafgu sa nahitabong engkuwentro tali sa New People’s Army sa Laak, Compostela Valley.
Una ng giila ni 1Lt Amadeuz VJ Celestial, Civil-Military Operations officer sa 60th Infantry Battalion ang biktima nga si Cherwyn Paragoya nga nakighiusa sa tropa sa kagamhanan dihang nahitabo ang bakbakan tali sa 23 ka mga rebelde nga gituohang sakop sa Guerrilla Front 33 sa Barangay Ceboleda, Laak.
Milungtad ang nahisgutan nga engkuwentro ug kapin usa ka oras diin mitabang na sab ang Philippine Air Force (Tactical Operations Group XI) pinaagi sa close air support.
Gikanayong 10 ka tuig na isip CAA si Paragoya diin usa sa iyang tahas mao ang pagmentina sa kahusay ug kalinaw sa ilang komunidad.
Nagpadangat sab sa iyang pahasubo si Lt. Col. Gilbert Ombos, 60th IB commander, sa kamatayon sa biktima.
Samtang gipasalig ni Mayor Antonio Libuangan sa Laak ug Gov. Jayvee Tyron Uy sa Compostela Valley Province nga tabangan ang nahibilin nga pamilya ni Paragoya.
Samtang gi-assist na sab karon sa 60th IB ug sa local disaster risk reduction and management offices sa Laak ug ComVal ang mga residente nga naapektohan sa engkuwentro.
Nagpadala na sab sumala pa si Cong. Ruwel Peter Gonzaga ug uban pang items aron nga maabagan ang lokal nga panggamhanan sa pagtabang sa mga apektado sa engkuwentro.
