DAVAO CITY – Atol sa first half sa kasamtangan nga tuig, nakatala sumala pa ang Davao City Transport and Traffic Management Office (CTTMO) ug 64 porsyento nga pag-ubos sa mga nadakpan nga mga jaywalkers sa dakbayan ngadto sa 7,565 gikan sa 20,964 sa susama nga panahon sa 2018.
Una ng gibutyag ni CTTMO head Dionisio Abude nga miubos sa 13,399 ka mga violators sa Anti-Jaywalking ordinance ang natala sa siyudad ning kasamtangan nga tuig. Sa 7,565 apprehensions, 3,929 niini ang wala na-settle samtang 3,727 ang pabilin nga wala nasulbad.
Gipahugtan pa karon sa CTTMO ang ilang apprehension batok jaywalkers sukad kaniadtong Nobyembre 2017 aron nga mapatuman ang disiplina ngadto sa mga Dabawenyos ilabi na ang pagtabok sa mga pedestrian lanes ingon man malikayan ang pipila ka mga aksidente sa kadalanan.
Gitataw sab ni Dionisio nga mamahimong nakatabang ang pag-ubos sa ihap sa mga nadakpan sa sunod-sunod nga mga aktibidad nga gipahigayon sa siyudad mapa-international, national o lokal.
Gumikan kay ilang gipakatag ang ilang mga personahe aron mahan-ay ang dagan sa trapiko samtang gipahigayon ang mga aktibidad, dali na lamang kanila ang pagsikop sa mga malapason sa balaud trapiko.
Nakatabang sab sumala pa s apag-ubos sa jaywalkers, ang pagka-disiplinado na sa mga dabawenyos gumikan sa ilang padayon nga information drive latas sa siyudad ingon man ang tukma nga pagtabok sa kadalanan.
Sulod sa bulan sa Hunyo ning tuig kasamtangan, nakakolekta na matud pa ang ahensiya ug kinatibuk-ang P423,175 gikan sa mga baglungon nga mga pedestrians.
