DAVAO CITY – Personal nga nangayo ug pasaylo sa opisyal sa Bureau of fire Protection (BFP) Davao si Dennis Ombao nga gikanayong maoy nanghapak ug usa ka personahe sa kabomberohan dihang miulbo ang sunog sa New Society Village Ilang ning dakbayan sa milabay nga semana.
Aminado si Ombao nga sayop ang iyang nahimong lakang ug dili sumala pa siya angayan nga pamarisan sa uban.
Mapasalamaton sab ang regional director sa BFP 11 nga si Fred Trajeras Jr. gumikan kay personal kini nga miadto sa ilang buhatan ug nangayo ug pasaylo sa iyang nahimo.
Subling sab nga gipasabot sa opisyal nga aduna silay mga protocol nga kinahanglan himuon panahon nga adunay moulbo nga kalayo.
Wala nay plano ang BFP nga moduso ug reklamo batok sa kang Ombao.
Kahinumduman nga gihapak ni Ombao ang usa ka personahe sa bombero human nga wala kini mituman kaniya kung asa dapit ipasirit ang tubig.
