DAVAO CITY – Hingpit na nga nahimong City Treasurer sa dakbayan sa Davao si City Treasurer Erwin Alfaraque.
Kini human nga gipirmahan sa Department of Finance ang iyang appointment. Si Alfaraque nangatungdanan isip acting city treasurer sukad Oktubre 2, 2018 puli sa mi-retire nga si Bela Linda Tangili.
Gitataw ni Alfaraque nga Pebrero 14, ning kasamtangan nga tuig gilagdaan ni Finance Secretary Carlos Dominguez the third ang katudlo-an ni Alfaraque, apan sa milabay nga semana lamang niya nadawat ang dokumento.
Atol sa flag raising ceremony kaganina gipasidunggan ni City Administrator Zulieka Lopez si Alfaraque gumikan sa 34 ka tuig na niini nga pagpangatungdanan sa dakbayan.
Si Alfaraque nakapangatungdanan na kaniadto sa City Treasurer, Business Bureau, nakapangatungdanan na sab siya kaniadto isip Human Resources Management Office (HRMO) head, ug Assistant City Administrator for Administration.
Gisaad ni Alfaraque nga paningkamutan sa CTO nga makab-ot ang dies bilyones ka pesos nga target collection karong tuiga.
Sa milabay nga tuig naka-kolekta ang maong buhatan ug 8.54 ka bilyon ka pesos.
