DAVAO CITY – Padayon ang imbestigasyon sa kapolisan labot sa pagkapusil patay sa usa ka GRO sa kaugalingon nga kustomer kagahapon sa kaadlawon.
Kahinumduman nga nahitabo ang pagpamusil alas 2:00 kagahapon sa kaadlawon sa Jasmin St., Magugpo West, Tagum City.
Naila sa imbestigasyon sa Tagum City Police Station ang biktima nga usa ka alyas Irene, 26 anyos, lumad sa Bukidnon.
Migawas sumala pa sa iyang gi-trabaho-an nga balay kalingawan alas 9:30 niining milabay nga gabii ang biktima ug pagka-1:30 sa kaadlawon duna siya’y kauban nga usa ka lalaki ug nag-check-in ug misulod sa Kaisan Lodging House.
Alas 2:00 sa kaadlawon migula ang wala maila nga lalaki ug misakay sa iyang motor apan migukod ang usa ka alyas Irene diin natigayon ang panaglalis sa duha nga misangpot sa pagpusil sa lalaki sa biktima.
Nasuta sa kapolisan nga 9MM nga armas ang gigamit sa suspek sa pagpusil-patay sa biktima.
Gidala pa sa Davao Regional Hospital ang biktima apan wala na matabang pa.
Ginasuta pa sa Tagum City Police Office kung dunay mga CCTV nga posibling nakakuha ug footage sa suspek aron nga magamit sa pag-ila sa suspek.
