Gipasalig sa mga sakop sa kapulisan nga magpakatag sila ug mas daghanang security forces sa 52 ka mga barangay sa siyudad ilabi na kadtong gipailalom sa category orange gumikan sa presensiya sa komunistang grupo.
Mohatag sab sumala pa sila ug dugang mga personahe alang sa Davao del Sur ug Davao del Norte gumikan sa intense political rivalry sa pipila ka mga areas.
Sumala pa kang Col. Alexander Tagum, city police director, nakadawat sila ug intelligence report nga ang dakbayan sa Davao aduna pa gihapoy presensiya sa mga rebeldeng grupo.
Gikanayong ang mga bukiron nga komunidad sa Paquibato, Marilog, Baguio ingon man pipila ka parte sa Calinan ug Buhangin ang gipailalom karon sa category orange.
Tulo ka mga infantry battalions ang mohatag sab ug security support sa kapulisan.
Gitataw sab sa city police director nga mas daghanang personahe ang ilang ipakatag gumikan sa taas nga bahad sa seguridad ingon man sa nahimong kamandoan ni Mayor Sara Duterte aron nga masiguro ang seguridad sa eleksiyon.
Bisan nga wala gibutyag ni Tagum ang ihap sa dugang mga personahe, sa kasamtangan 2,000 ka mga kapulisan ang mobantay sa eleksiyon ug 10,000 sa tibuok Davao region.
