DAVAO CITY – Gipasabot ni Department of Interior and Local Government (DILG) Davao director Alex Roldan nga kinahanglan na nila nga ipatuman ang pagpasara sa tanan buhatan sa Kapa-Community Ministry International Inc. kun Kabus Padatuon (Kapa).
Sumala sa opisyal nga wala silay interes sa Kapa inay buot lamang nila nga ipatuman ang kamandoan nga gipagula sa Securities ang Exchange Commission (SEC). Gani mismong ang DILG national sumala pa ang nagpagula sa nahisgutan nga kamandoan.
Gitino sa opisyal nga kung dili ipatuman ang kamandoan hayan nga mapasakahan ug kaso ang Mayor sa lugar diin nag-operate ang Kapa hinungdan nga kinahanglan mohimo gilayon ug lakang ang mga nahisgutan.
Gitahasan nga magpatuman sa maong lakang ang mga sakop sa Philippine National Police, National Bureau of Investigation, ug tanang Local Government Unit ang mando sa Department of Interior and Local Government (DILG) national.
