DAVAO CITY – Giawhag ni Ret. P/Maj. Simplicio “Bobet” Sagarino, head sa Anti-Scam Unit ning syudad ang publiko nga dili basta-basta magpailad nga nagpaka-aron ingnon nga abogado ug mas maayong moadto sa mga lihitimong abogado nga adunay opisina.
Tipik lamang kini human ang pagkasikop sa pekeng abogado atol sa gipahigayon nga entrapment operation sa hiniusang pwersa sa Anti-Scam Unit sa Davao City ug National Bureau of Investigation (NBI) XI sulod mismo sa Hall of Justice, Ecoland ning dakbayan kagahapong adlawa. Una ng naila ang suspek nga si Wilhermo Rowena, legal ang pangedaron.
Una ng gibutyag ni Sagarino nga nagpatabang sa buhatan niini ang usa ka complainant nga adunay kabanay nga dunay kaso nga adunay kalabotan sa iligal nga droga human nga wala matod pa mipatim-aw ang usa ka abogado nga ilang gikuha gikan sa Hall of Justice bahin sa arraignment sa nasangpit nga kaso.
Tungod niini gisubay sa Anti-Scam Unit ning syudad kaabag sa NBI XI ang nasangpit nga insidente ug gilayong nakig-alayon sa Integrated Bar of the Philippines kon IBP-Davao Chapter, Hall of Justice ingon man usab sa Supreme Court aron i-verify ang pangalan ni Rowena apan pakyas matod pa kining makita ang pangalan niini hinungdan nga didto na gilusad ang maong operasyon human masayran nga peke diay kini nga abogado.
Kagahapon, malampuson nga nasikop sulod mismo sa Hall of Juctice, Ecoland ning syudad ang suspek nga nakasuot pa ug barong atol sa gilusad nga operasyon. Sa kasamtangan, anaa sa kustodiya sa NBI XI ang nasampit nga suspek ug gikatakdang pasakahan ug kasong pagpangilad.
