DAVAO CITY – Gipasalig sa Davao City Police Office (DCPO) nga himuon nila ang tanan aron nga dili na mahitabo ang insidente diin mibusikad ang mga eksplosibo sulod sa stockroom sa Davao City Police Office (DCPO) sa milabay nga adlaw.
Kahinumduman nga nabati ang pagbusikad sa Technical Support Platoon, EOD/K9 Unit sa Davao City Police Office hinungdan nga nabulabog ang mga residente nga nanimuyo duol sa lugar.
Dihang gisusi kini sa otoridad, namatikdan nga ang Ammunition Storage ang nasunog nga miresulta sa pagbusikad hinungdan nga daling gipahibalo si PCapt. Artemio N. Pabuhot, JR., team leader sa Explosive and Ordnance Division ug sa K9 ug gipapahawa ang mga personahe gikan sa barracks area.
Gisundan gilayon kini sa pagpasulod sa mga truck sa Bureau of Fire Protection (BFP) aron nga mapasiritan ug tubig ang nagdilaab nga storage room nga natapus human sa kinse minutos nga operasyon.
