DAVAO CITY – Unom ang gikatala nga patay samtang usa ang gikatahong missing sa nahitabong sunog sa Purok 9-A, Adecor Compound, Poblacion, Maco, Compostela Valley Province bandang alas-3:30 sa kagahapon Huwebes Santo.
Tungod sa ka paspas nga pagkuyanap sa kalayo, nakulong ang mga biktima hinungdan nga pulos sila nangamatay sulod sa balay nga gipanag-iyahan sa usa ka Marina Villarosa.
Giila sa Bureau of Fire Protection (BFP) ang mga biktima nga sila si Carmen Bilocura, 55 anyos; Ian Bilucara, 24 anyos; Marjan Ardon, 22 anyos; Kisses Ardon, 6 ka bulan; Rico Bilocura, 19 anyos ug Karen Bosalla, 20 anyos.
Na-recover ang ilang mga sunog nga mga lawas.
Samtang missing ang biktimang si Jane Ryle, 13 anyos.
Matod pa nga nag-arkila lamang sa maong balay si Carmen Bilocura uban ang iyang mga anak.
Migula sa inisyal nga imbestigasyon nga gituyo ang pagsunog sa balay ug ang gitudlong suspek ang live-in partner ni Carmen.
Miabot sa P300,000 ang danyos sa sunog.
Gidala ang patay’ng lawas sa mga biktima sa punerarya sa Maco, Comval.