DAVAO CITY – Puno sa pagmahay ang usa ka lalaki kansa gipatay ang kaugalingon nga igsuon tungod sa iyang kalagot nga gi-uyab niini ang iyang kanhi hinigugma.
Gipusil sumala pa sa suspek nga si Jaime Panerio, 33 anyos ang iyang igsuon nga si Mitchie Panerio, 28, minyo, mag-uuma ug Elmon Calugas, 31 anyos.
Nahitabo ang insidente sa Lower Pogpog, Barangay Sibulan, Sta. Cruz, Davao del Sur. Sa imbestigasyon sa Sta. Cruz Municipal Police Station, nag-inom ang tulo gawas sa balay ug dihang sa pagsulod sa suspek sa balay iya sumala pa nga naabtan ang iyang kanhi hinigugma.
Tungod sa iyang kalagot iya kining nakulatahan ug iyang gipamusil ang duha niya ka mga kauban sa inom gamit ang 357 revolver nga maoy hinungdan sa ilang kamatayon.
Sumala ni Jaime, gikabit sa iyang manghud ang iyang kanhi uyab nga gipamatud-an sumala pa sa ilang higala. Hinuon wala na nakaikyas ang suspek ug dali kini nga nasikop sa otoridad.
Gipaslak na sab kini karon sa presohan sa Sta. Cruz MPS samtang gipahiluna na sab ang patay’ng lawas sa mga biktima sa ilang panimalay.
