DAVAO CITY – Gisugyot sa usa ka konsehal ning dakbayan ngadto sa Land Transportation Office (LTO) nga kinahanglan i-require ang mga nanag-iya motorsiklo nga mopailalom sa motorcycle riding course gumikan sa nagkataas nga ihap sa mga aksidente sa kadalanan nga sagad kalambigitan sa mga motorsiklo.
Matud pa kang Konsehal Mary Joselle Villafuerte, kinahanglan sumala pa nga mopailalom una sa maong kurso ang mga motorcycle riders ayha mopalit ug unit aron nga makunhuran ang traffic accidents.
Gitataw sab ni Villafuerte nga sagad mga driver ang hinungdan sa aksidente ug dyutay lamang ang road conditions o actual vehicle.
Sa higayon nga mapatuman, ang motorcycle training course certificate magsilbi nga rekisitos uban ang lisensiya sa driver.
Sa kasamtangan ang training course ipahigayon una nga libre gumikan kay plano sa iyang komite ug uban pang buhatan nga sakop sa traffic management, nga i-tap ang mga motorcycle companies.
Gitataw sab sa opisyal nga ang mga motorcycle companies kinahanglan adunay social responsibility aron nga mapabilin nga luwas ang mga riders.
