DAVAO CITY – Wala pa gihapon maila ang lalaki nga nakaplagan nga gibinaklid sa paggapus ang mga kamot ug tiil, ug gibutangan ug packing tape ang baba sa biktima nga gihulog sa Balutakay river, sa lungsod sa Hagonoy, sa lalawigan sa Davao del Sur.
Padayon pa gihapon ang Hagonoy Police Station nga nagpahigayon ug mas lalum nga imbestigasyon aron nga maila ang biktima nga wala’y mga identification cards dihang nakaplagan nga naglutawlutaw sa suba.
Usa ka mangingisda ang nakakaplag sa patay nga lawas ug dali sab dayon nga nakig-alayon sa mga Barangay Officials nga mao sab ang mi-report ngadto sa mga police.
Ang biktima nga gibana-bana nga nagpangidaron ug 25 hangtud sa 35 anyos. Nakahi-agum kini ug mga samad sa pagkapusil sa ulo ug nagkada-iya nga bahin sa lawas.
Nagsugod na sa pagkadugta ang lawas sa biktima dihang nakaplagan sa mangingisda nga si Ronel Dela Cruz nga residente sa Hagonoy, Davao del Sur.
Wala’y nakaila sa biktima nga posibli sumala pa nga nga gipatay sa uban nga lugar ug gihulog lamang sa tulay sa Barangay Balutakay, Hagonoy, Davao del Sur ug gi-anod lamang mao nakaplagan sa mangingisda.
Gibanabana kini nga anaa sa lima ka tiil ug upat ka pulgana ang katas-on sa biktima, kasarangan ang panglawas ug nagsul-ob ug pantalon ug t-shirt dihang nakaplagan.
