DAVAO CITY – Tanghaga pa karon kung kinsa ang nanag-iya sa na-recover nga kalabira sa tawo sulod sa nasunog nga NCCC mall.
Nakaplagan ang nahisgutan nga kalabira sulod sa storage room sa third floor sa nahisgutan nga gambalay.
Sumala pa kang Fire Inspector Eseguil Tabon, Chief for Operation sa Bureau of Fire Protection Davao City nga ang contractor sa pagdemolish sa NCCC mall mao ang nakakaplag sa kalabira.
Dugang pa ni Tabon nga mireport gilayon sa mga otoridad ang contractor human nila nakaplagan ang nahisgutan nga kalabira hinongdan nga nahipus gilayon pinaagi sa pagsulod sa styro box.
Gikuha-an sab ug sample ang nahisgutan nga mga bukog aron nga mailhan kung kinsa kini. Posibli sumala pa nga nalumos sa aso ang biktima sa sunog niadtong Desyembre 23, 2017.
Gitataw ni Tabon nga wala masunog ang mga bukog, apan labihang ugaha ug mi-abot pa ug unom ka bulan ayha pa kini nadugta.
Gidangop na sa inter-agency task force nga mao ang gagunit sa kaso alang sa pag-imbestiga ug posibling pag-ila sa nahisgutan nga biktima.
