DAVAO CITY – Naka-full alert karon ang Baguio Police sa kabalaka nga panimaslan sa mga rebeldeng New People’s Army (NPA) human nga napatay sa tropa sa kagamhanan ang ilang duha ka mga kabanan.
Kahinumduman nga patay ang duha ka mga NPA human nga gikasangka niini ang tropa sa 3rd Infantry Battalion Philippine Army dili pa lamang dugay.
Una nang naila ang mga nangamatay nga sila si Renante Largo, medic officer sa Pulang Bagani Command (PBC) 2 ug usa ka Glen Malcampo, sakop sa Guerilla Front (GF) 53 batok sa mga sundalo nga sakop sa 3rd Infantry Brigade Philippine Army.
Naluwas sab sa kasundalohan sa kagamhanan ang mokabat ngadto sa traynta ka mga sibilyan nga gika-ingong gi-hostage sa mga NPA dihang miulbo ang panagsangka. Kahinumduman nga tulo sab ka mga sundalo ang samdon dihang naigo kini sa mitu-asik nga shrapnel sa M2O3 Grenade Launcher sa mga rebelde ug padayon nga gitambalan sa Camp Panacan Hospital.
Sumala pa kang Lt. Col. Raymund Lachica, Commanding Officer sa 3rd Infantry Brigade una sila nga nakadawat ug report sa presensya sa mga rebelde sa Barangay Carmen aron nga mang-recruit ug mga bag-o nga mga sakop.
Hugtanon nga gipanghimakak sa mga ginikanan nga mga sakop sa NPA ang mga napatay nga sila si Largo ug Malcampo.
Menor de edad pa sumala pa si Malcampo.
Nasayran nga pulos mga residente sa Barangay Astorga, Sta. Cruz, Davao del Sur ang mga napatay.
