DAVAO CITY – Padayon ang gilusad nga imbestigasyon sa kapolisan may kalabotan sa pagbusikad sa improvised explosive device (IED) daplin sa karsada sa Sitio Catmonan, Barangay Macambol, Mati City, Davao Oriental kagahapon sa hapon.
Sa kakusog sa pagbusikad nabuak ang atubangan nga windshield sa Izuzu Elf Truck ni retired police Ferdinand Mabandos nga gikuyogan sa iyang higala nga usa ka Omar Husien.
Swerte nga nakapalayo sa dapit ang mga biktima.
Sumala pa kang Police Supt. Adolf Ian, hepe sa Mati Police nga posibli nga nasaypan lamang si Mabandos gumikan kay ang sakyanan niini susama ug panagway sa gisakyan sa mga sundalo ug mga ginsakpan sa DENR.
Kahinumduman nga mas gipakusgan sa DENR ang kampanya sa pagpanalipod sa kinaiyahan sa Davao Oriental.
Gitan-aw sab sa kapolisan ang anggulo nga binuhatan kini sa Lawless Armed Groups nga naglihok sa dapit.
