DAVAO CITY – Bisan tuod nga adunay panagsabot tali sa Dasia Security Agency ang nanag-iya sa armored car nga nakabangga-patay sa dos anyos bata ug sa kabanay niini nga bayaran ang tanan gasto, dili pa gihapon hingpit nga lusot ang driver nga si Antonio Gregorio Veto Jr. sa kaso.
Una ng gibutyag ni Police Chief Inspector Ma. Theresita Gaspan ang tigpamaba sa Davao City Police Office (DCPO) nga naduso gilayon nila ang kaso kagahapon sa hapon hinungdan nga hulaton na lamang sa suspek ang mosunod nga kamandoan gikan sa korte.
Gikanayong nagbaton ug verbal agreement ang kabanay sa biktimang si Louie Jay Terol Pangantihon ug Dasia Security Agency nga ang kompanya maoy mo-abaga sa tanan nga galastuhon gikan sa pagdala sa bata sa Kapalong Davao del Norte diin lumad nga nanimuyo ang kabanay sa biktima, hangtud na sa haya ug lubong niini.
Karung adlawa, subli nga magkita sa San Pedro PNP ang kabanay ug mga personahe sa DASIA alang sa dugang nga panagsabot ug kung hingpit na ba nga i-withdraw sa kabanay sa biktima ang kaso batok sa driver nga pabilin karon nga gibalhog sa San Pedro PNP.
