DAVAO CITY – Mihatag gilayon sa iyang pagtimbaya karong adlaw nga natawhan ni Pangulong Rodrigo Duterte ang iyang anak nga si kanhi Vice Mayor Paulo Duterte.
Sumala kang Pulong nga luyo sumala pa sa mga kalagot ug kalipay nilang duruha, magpabilin matud pa siya nga anak ni Pangulong Duterte. Naminaw ug nakasabot sab sumala pa siya sa tanan nga mga yawyaw sa iyang amahan.
Gitataw sab ni Paulo nga dili lalim nga mamahimong amahan sa pinakabut-an niya nga anak hinungdan nga nangayo kini ug pasaylo ilabi na matud pa sa mga panahon nga nadungagan ang iyang mga puti nga buhok sa ulo.
Naglaom ang kanhi Bise Mayor nga unta muabot sumala pa ang panahon nga ipanghambog sab siya sa Pangulo.
Sayod sumala pa siya nga dili niya maangkon ang nakab-ot karon ni Pangulong Duterte apan gipasalig niya nga himuon niya ang tanan aron nga mamahimong proud lamang kaniya ang iyang amahan.
Gibutyag sab ni Pulong nga maningkamot siya ug ang iyang mga igsuon aron nga dili lamang maulawan ang Pangulo.
Nagpasalamat sab kini kang Pangulong Duterte sa mga gihatag nga tabang kaniya ug sa iyang pamilya ingon man ang taas-taas nga pasensiya.
Kahinumduman nga una na sab nga gibutyag ni Special Assistant to the President (SAP) Bong Go nga sama sa naandan, simple lamang ang mamahimong selebrasyon ni Pangulong Duterte sa iyang adlaw nga natawhan karong adlawa ug laoman nga makauban lamang niini ang iyang tibuok pamilya dinhi sa dakbayan.
Posible sab sumala pa nga magpabilin dinhi sa siyudad si Pangulong Duterte ning panahon sa kwaresma.
