DAVAO CITY – Gibutyag ni Police Chief Inspector Emerson Pugong, hepe Sasa PNP nga iduso na nila karon ang adlawa ang kasong Frustrated Parricide batok kang Randy Candiente, hamtong ang pangidaron ug residente sa Purok 6, Malagamot, Panacan, Davao City nga maoy gitudlong midaob sa iyang tres anyos nga anak.
Subay sa imbestigasyon sa kapulisan halos masunog ang tibuok bahin sa lawas sa bata human kini gidauban sa iyang kaugalingon nga amahan.
Nasayran ni PCI Pugong nga gikan nag-inom ang suspek ayha gihimo ang krimen ug gani lango pa kini sa ilimnog makahubog dihang gi-adtuan sa otoridad.
Apan, hugtanong gipanghimakak sa suspek nga iyang gidabdaban ang iyang anak uug nagkanayong posibleng nayab-an kini ug gas nga maoy hinungdan sa iyang pagkasunog.
Kritikal ang bata dihang gidala sa Southern Philippines Medical Center, apan gideklara kining patay na sa mga doktor alas 6:30 kagabii gumikan sa grabeng samad sa kalawasan.
Sa pikas bahin, buot sa inahan sa bata nga madugta sa prisuhan ang suspect gumikan kay dili gayud niya kini mapasaylo.
Sumala pa ni Maricris Orias, inahan sa bata ug kanhi ka-ipon sa suspect, iyang gibulagan si Candiente gumikan kay kanunay siyang kulatahon niini, gawas pa sa pagka-palahubog, ug sobrang katapulan.
Gani, bisan kaniadtong gibuntis pa niya ang ilang anak kanunay siyang bun-ugon niini, hinungdan nga nakahukom siyang biyaan kini human ang tulo ka tuig nilang panag-ipon.
Nanarbaho sumala pa si Orion sa layo ug gibilin ang ilang anak sa iyang inahan hinungdan nga nakahigayon ang suspect nga kuhaon kini, ug sa dihang naa na sa poder sa suspect ang bata kanunay na niiya kining pasakitan.
