DAVAO CITY – Mibiyahe na usab kaganinang buntag paingon sa kauluhan ang ika-duhang batch sa mga kanhi sakop sa NPA aron makig-salo kang pangulong Rodrigo Duterte sa Malacañang sakay sa duha ka Philippine Air Force C-130 aircraft sa Davao City International Airport.
Ang nahisgutang grupo ang gilangkuban sa 241 ka mga former rebels nga naggikan sa Compstela Valley province ug sa Davao del Norte. 38 niini mga babaye samtang 203 mga lalaki.
Ang mga nahisgutan ang kabahin sa 683 ka mga kanhi rebeldi gikan sa nagkadaiyang bahin sa Eastern Mindanao nga na-una nang gipresenta sa presidente niadtong December 21, 2017, sa Panacan, ning syudad.
Tumong sa nahisgutang biyahe nga mahatagan ug mas maayong panlantaw sa kinabuhi ang mga kanhi rebelde, partikular na sa peace building ug sa nationalism.
Kabahin usab kini sa padayong proyekto sa gobyerno labot sa paghi-usa sa mga kanhi rebeldi ngadto sa komunidad. Usa sa ilang suruyan ang makasaysayanong Luneta Park ug Intramuros.
Ipahigayon ang welcome ceremony ugmang adlawa Miyerkules – February 21, 2018, sa Camp Aguinaldo nga pangunahan mismo ni General Rey Leonardo Guerrero, AFP Chief of Staff, nga sundan sa usaka salo-salo sa meryenda uban kang pangulong Duterte.
Hatagan usab ug kahigaynan ang mga rebel returnee nga ika-himamat ang mga kanhi usab sakop sa NPA nga nahimo na karong kaabag sa gobyerno sa adbokasiya sa peace and developement.
Mahuman ang 3 ka adlaw nga lakbay aral sa mga kanhi rebeldi sa Pebrero 22.
kahinumduman nga na-una nang mibiyahe ang 1st batch o 215 ka mga rebel returnee niadtong pebrero 6-8.
Sa pikas bahin, gina-andam na usab ang sunod nga biyahe sa 3rd batch sa mga rebel returnee.
