DAVAO CITY – Dako ang pagtoo sa mga residente sa Magsaysay, Davao del Sur nga pagpanimalos sa mga New People’s Army (NPA) ang motibo sa pagsunog sa backhoe didto sa Purok 4, Barangay New Ilocos, alas 8 sa gabii, sa miklabay nga adlaw.
Milutaw sa imbestigasyon sa kapulisan nga anaa sa kapin kon kulang 20 ka mga armado ang nibubo og gasolina sa Sunward backhoe nga gipanag-iyahan ni Alejandro Tolero, molupyo sa Barangay Colorado, dakbayan sa Digos.
Sumala ni Senior Inspector Edilberto Cabillo, hepe sa Magsaysay Municipal Police Station nga ginagamit ang backhoe sa quarry operation ni Edwin Brieta didto sa Barangay Blocon sa lugar.
Daling miresponde ang kapulisan apan wa na nila maabti ang mga rebelde nga abtik nakasibat padung sa wa matinong direksiyon.
Nahitabo ang insidente human narekober sa kasundalohan ang mga tag-as nga kalibre sa armas didto sa Barangay Takul, pipila ka semana ang milabay.
Tungod sa presensiya sa mga armadong grupo nadelatar sab ang pag-konkreto sa P140-milyones nga Barayong-Mabini-Bala-Upper Bala Farm to Market Road (FMR) project apil ang P90-milyones nga Poblacion-San Isidro-Tacul FMR nga proyekto tungod sa hulga sa mga NPA.
Apan nagpadala na og dugang puwersa sa militar ug kapulisan sa lugar aron mas pahugtan ang seguridad sa mga pasilidad ug proyekto sa gobyerno.
