DAVAO CITY – Mibati ug kabalaka ang nanag-iya sa usa ka establisyemento sa kanto Legazpi ug Magallanes St. ning dakbayan human nga nakadawat sila ug bomb threat pasado alas singko kagahapon.
Matud pa kang Liza nanag-iya sa establisyemento nga Heaven’s gown, dihang nadawat niya ang mensahe, gilayon niya nga gipagawas ang ilang mga kostumer ug gipahibalo ang mga kasikbit nga gambalay nga maoy nanawag usab sa otoridad.
Hinuon paspas nga miresponde sa lugar ang mga sakop sa EOD team, Task Force Davao ingon man kapulisan apan negatibo sa bomba ang gambalay.
Gibutyag sab ni Capt. Nolasco Mempin ang commander sa Task Force Davao (TFD) nga posibleng ang mga kanhi ka-transaksiyon o kustomer nga nakabangi sa nanag-iya sa establisyemento ang mipaluyo sa pagpadala ug bomb threat.
