DAVAO CITY – Misurender sa kasundaluhan ang managsuong nagpa-ilang squad leader ug membro sa NPA nga naglihok sa Compostela Valley Province.
Giila ni Capt. Andrew Linao, ang civil- military operations (CMO) officer sa 701st Infantry Brigade, ang mga misurender nga mao ang managsuong Jay-Ar ug Jonel, mga sakop sa Guerrilla Front 2, Sub-regional Committee 2, Southern Mindanao Regional Command.
Ang managsuong alyas Jonel ug Jay Ar ang misurender ngadto sa 28th Infantry battalion nga naka-base sa Pantukan, Compostela Valley, dala ang duha ka improvised grenades, usaka improvised bombo ug duha ka piraso sa iksplosibo.
Gisaysay sa managsuon nga gi-recruit sila niadtong March 2012 ug October 2017, ug nakahukom sila nga mosurender human gikumbinsi sa ilang mga paryente.
Gipa-ilalom gilayon sila sa medical exam ug kasamtangang gipa-ilalom usab sa custodial debriefing sa headquarters sa 28th IB.
